स्थानिय तहमा अघि बढ्दै स्काउटिङ अभियान ।

May 25, 2022

स्याङ्जाको पुतलीबजार नगरपालिका र कास्कीको माछापुच्छ्रे गाउँपालिकामा ६ दिने आधारभूत स्काउट तालिम (बिटिसी) भएको छ । चैत २५ गतेदेखि सुरु तालिममा २ ठाउँमा गरी ४८ विद्यालयका ५४ जना शिक्षकको सहभागिता थियो ।शिक्षकहरुमार्फत विद्यार्थीलाई स्काउटिङ अभियानमा सहभागी गराउने उद्देश्यले तालिम आयोजना गरिएको प्रदेश स्काउट कार्यालय गण्डकी प्रदेशका प्रदेश अधिकृत विजय पौडेलले बताए । प्रदेशका अन्य पालिकामा पनि तालिम सञ्चालन गरी विद्यालय तहदेखि बालबालिकालाई स्काउटिङ अभियानमा जोड्न लागिएको जानकारी उनले दिए ।

पुतलीबजार नगरपालिकामा भएको तालिम मेयर सीमा क्षेत्रीले उद्घाटन गरेकी थिइन् । कार्यक्रममा प्रतिनिधि सभा सदस्य नारायणप्रसाद मरासिनी, स्काउट पुतलीबजार नगरपालिकाका स्काउट प्रमुख तथा उपमेयर महेश पुरी, नेपाल स्काउट गण्डकी प्रदेशका संयोजक आशीर्वाद सुवेदी, प्रदेश अधिकृत विजय पौडेल नगरपालिकाका संयोजक अमृत नेपालीको उपस्थिति थियो । कोर्स लिडर सहायक राष्ट्रिय प्रशिक्षक विष्णुप्रसाद पराजुली थिए / कास्कीको माछापुच्छ्रे गाउँपालिकामा स्थानीय स्काउट संरक्षक तथा पालिकाका प्रमुख कर्णबहादुर गुरुङ, स्थानीय स्काउट प्रमुख तथा पालिका उपप्रमुख कृष्णकुमारी दवाडी, नेपाल स्काउट गण्डकी प्रदेश संयोजक आशीर्वाद सुवेदी, पालिकाका प्रमुख प्रशासकीय अधिकृत विष्णु पोखरेल, स्थानीय तदर्थ समिति संयोजक कानुन लामिछाने, पालिकाका वडा अध्यक्षहरुको उपस्थिति थियो । कोर्स लिडर नेपाल स्काउटका पूर्व राष्ट्रिय तालिम आयुक्त नारायण पराजुली थिए

।